Dumadine Gunung Wurung

Gunung Wurung iku salah sijine gunung cilik kang ana ing tlatah Kebumen, penere ing dhusun Parang, Kecamatan Karangsambung.

Kacarita, ing jaman biyen ana ing tlatah Kebumen wewengkon Karangsambung iku ana dhusun kang lemahe rata, ora ana sijia punthukan utawa gumuk ing dhaerah kuwi. Mula, ing sawijining wengi para sesepuh ing dhusun kuwi padha nglumpuk lan ndedonga marang dewa ing kayangan, supaya digawekake gunung ing cedhake dhusun kuwi. Panjaluke para sesepuh kuwi disaguhi dening para dewa, nanging para warga ing dhusun iki uga kudu nyaguhi panjaluke para dewa kuwi.

Banjur digawe perjanjian antarane leloron kuwi, yaiku menawa para dewa lagi nggawe gunung kuwi, menungsa utawa para warga dhusun kuwi ora ana kang kena meruhi. Dina sabanjure para sesepuh kuwi aweh wara-wara marang para warga babagan pawarta lan prajanjene karo para dewa supaya ditetepi. “Wara-wara kanggo para warga, supaya mengko nalika srengenge wis surup, kowe kabeh mlebua ing ngomahe dhewe-dhewe nganti sesuk srengenge njedhul” mangkono prentahe para sesepuh. Salah sijining warga banjur nyuwun pirsa, “Nuwun sewu Rama, wonten menapa sejatosipun ing dhusun menika?”

“Para dewa arep nggawekake gunung ing dhusun iki, nanging ora ana kang kena meruhi anggone para dewa nyipta gunung mau”, wangsulane sesepuh liyane. Bareng para warga mangerti, banjur wektu srengenge wis arep surup kabeh warga mlebu ing omahe lan ngunci lawang. Ora let suwe, para dewa banjur mudhun saka kayangan banjur miwiti anggone nyipta gunung mau. Panggawean iki diwiwiti kanthi gawe saka-saka kanggo nguwatake dedege gunung.

Nalika wektu wis ngarepake  pletheking srengenge, anggone gawe gunung kuwi durung rampung, namung kurang ngurug lemah sethithik  saengga mujudake gunung. Para dewa kang lagi nyereg anggone gawe gunung, dumadakan saka dhusun kuwi ana bocah wadon kang  lagi mlaku tumuju ing kali Lukulo kang cedhak karo panggonan dewa anggone gawe gunung. Nalika mlaku dheweke weruh gunung ing cedhake kali, lan uga weruh wewujudan kang nggawa watu-watu kanggo nggawe gunung. Amarga trataben, bocah wadon mau mlayu bali karo bengok-bengok, lan beras kang digawa kanggo dipususi mabyur ing lemah. Wusanane, para dewa krungu swara manungsa lan mangerti yen wis ana wong kang weruh gunung kuwi banjur padha lunga saka papan panggawean lan mandheg anggone gawe gunung lan bali ing kayangan.

Gunung kuwi durung rampung digawe, wurung panggaweane para dewa, saengga gunung kuwi banjur diarani gunung Wurung, lan ing pinggiran gunung kuwi akeh watu-watu werna putih. Masarakat ing dhusun kuwi percaya yen watu-watu kuwi asale saka beras kang wutah.

Estri Wiji Asih
10205244019