Arisane Dhemit

Arisane Dhemit

Dina iki malem jumat legi. Aku karo Mbakyuku pengajian neng omahe pak Slamet. Omahe Pak Slamet rada adoh, ya kira-kira sekilonan saka omahku. Bengi iki desaku katon sepi banget, mbuh ana apa. Padahal wengi iki wayahe pengajian rutin sing ditindakake dening ibu-ibu sing ana ing Desa Jambulegi iki. Tiba jam pitu bengi aku langsung mangkat karo Mbakyuku. Nanging aku ngampiri tanggaku sing ana ing sebelah omahku dhisik. Sak wise aku ngampiri, aku langsung mangkat.

Tekan kana wis rame banget, akeh ibu-ibu sing wis teka neng kono. Ora let suwe pengajian iki dimulai. Kaya biasane ya ana konsumsine sing disuguhna ana ing pungkasan pengajian iki. Sak wise jam 9, pengajian rampung. Aku langsung bali bareng-bareng karo Mbakyuku, tanggaku lan ibu-ibu liane.

Ana ing dalan aku mampir tuku bakso dhisik karo mbakyuku, lan tanggaku. Neng warung bakso, aku dicritani  tanggaku iki. Mbak Nita jenenge. Dheweke crita yen ning desa kene ana kuntilanak, mbiyen matine merga disantet karo kancane sing iri karo dheweke. Akhire mati lan medeni  wong sing ana ing desa. Kahanan bengi kuwi dadi medeni banget. Bubar mangan bakso aku banjur mulih.

“Piye ya nek kuntilanak kae metu neng ngarepe dhewe?” Mbakyuku ngendika. “Ojo ah mbak aku wedi ki,” aku njawab.

Tekan tengah dalan aku wedi banget nalika neng ngisor wit klapa aku ngerti ana wong wadon nganggo klambi putih. “Mbak kae apa ya? Putih-putih?” aku takon marang Mbakyuku. “Oalah kae Bu RT ngangge klambi putih.” Mbakyuku mangsuli. Sak uwise kuwi aku ayem, tibake bener Bu RT sing ngangge klambi putih.

Aku terus mlaku karo Mbakyuku, atiku wis ora penak tapi wengi iki. Isih urung tekan omah, ana dalan aku ketemu tukang becak, dheweke ngomong ngene nang aku, ”Ati-ati mbak, neng dalan kono enek kuntilanak lho.”

Aku mung meneng wae. Tapi ora let suwe Bapake mau bengok-bengok, jerene becake ora bisa mlaku. Jerene neng nduwur becake enek wong gedhe banget lungguh, rambute dawa lan ireng. Tukang becak mau keweden banjur becake ditinggal mlayu.

Aku saya wedi, aku wedi yen diwedeni setan sing medeni tukang becak mau. Aku mlayu banter banget karo mbakyuku lan Mbak Nita, teka dalan pas ing ngisore wit klapa mak gluduk ana barang ceblok teka ndhuwur. Aku kaget bareng tak ingeti tibake kuwi gundule wong, lan mringis neng aku, wong telu langsung padha njerit kabeh. Banjur mlayu bareng.

Teka omah aku karo Mbakyuku isih kaget banget ngerti kedadean kaya mau, Mbakyuku jupukke aku banyu putih. Tangga sebelah omahku mau melu mlebu neng njero omahku.

Bengi iki akeh banget setan sing medeni aku. Sing pertama setan gedhe ireng sing di omongne tukang becak mau, ke loro gundul mringis. Tak pikir-pikir dina iki mau akeh setan pada kliyaran nang desaku, apa  mergane dina iki malem Jumat. Banjur setan-setan padha metu. Apa setan-setan ya ana pengajian apa ana arisan, aku malah ngguyu dhewe neng jero atiku. Tanggaku langsung jaluk diterke mulih, aku sing ngeterke karo Mbakyuku merga aku ora wani ngeterke dhewe, aku isih keweden karo setan-setan mau.

Dening: Rizqi Amalia.