Kasiyate Lamtoro

Wit Lamtoro nduweni jeneng beda-beda ana ing ngendi papan, ana sing nyebut Mlanding, Kemlandingan, utawa Petai Cina. Dene basa Latine Leucaena Glauca Benth. Lamtoro akeh ditandur masarakat minangka turus ing pager-pager pekarangan, ing kebun Kopi lan Panili minangka tanduran perindang lan tanduran pupuk hijau. Godhonge nyirip majemuk, kembange kembang majemuk, wujude bongkol. Tuwuhan iki wohe arupa wiji, pancen rada pait rasane ananging asipat netral. Saperangan gedhe bahan kimia kang kinandhut ing antara liya kalsium, lemak, fosfor, zat besi, protein, sarta vitamin A, B1 lan C. Dene wijine ngandhut mimosin, leukanin, protein, lan leukanol.

Lamtoro iki bisa dimanfaatake kanggo obat-obatan. Bisa kanggo obat maneka warna lelara kayata, obat cacing, kanggo bancarake bebuwang banyu, kanggo balung putung, susah turu (Insomnia), bengkak, radang ginjel, lan kencing manis. Oyod tuwuhan Lamtoro iku uga bisa dimanfaatake kanggo bancarake garapsari mligi kanggo priyayi putri.

Dene resepe yaiku, kanggo ngobati kencing manis, sasendok teh bubuk wiji tuwuhan Lamtoro dicom karo wedang panas setengah cangkir, diudhak nganti rata lan diunjuk nalika isih manget-manget saampase. Wedang ramuan mau diunjuk satengah jam sadurunge dhahar, loro nganti kaping telu sadina.

Kanggo ngobati cacingan, bengkak (Oedem) lan radang ginjal, kagodhog 3-5 gram bubuk wiji Lamtoro kang wis garing nganggo secangkir banyu panas, diudhak, banjur diunjuk manget-manget. Wedang obat iki diunjuk kaping telu sadinane kanthi dosis kang padha.

Kanggo ngobati bisul, balung putung, lan susah turu, kagodhog 10 gram kabeh bagiane tuwuhan Lamtoro nganggo telung gelas banyu nganti mung kari sagelas. Banjur diunjuk sadina sapisan nalika isih anget.

Dene kanggo bancarake garapsari yaiku sagegem oyod tuwuhan Lamtoro kang wis diresiki lan digaringake digodhog karo telung gelas banyu nganti kari sagelas. Banjur diunjuk, sagelas, kaping pindho sadinane.

Ngaluske Kulit

Lamtoro utawa Petai Cina iki nduweni kasiyat liya yaiku godhonge kang bisa nganggo ngaluske kulit. Resep ramuane yaiku godhong Lamtoro sing durung tuwa banget sacukupe diuleg utawa dibebek nganti lembut/alus. Godhong Lamtoro kang wis lembut kuwi mau ditambahi banyu sathithik, sacukupe nganti nyemek-nyemek. Banjur dibalurake ing kulit lan digosok-gosok nganti warata. Dienteni nganti sawatara 1-2 menit, banjur disiram banyu nganti resik. Ditindakake loro nganti telu rambahan saben minggune, lan yen rasa gatel aja diterusake tegese ora cocok.

Kasiyat liyane yaiku godhong Lamtoro sing enom dimamah kanggo nambani tatu anyar, lan who lamtoro sing tuwa banget bisa kanggo lawuh yaiku “bothok”. Sugeng nyoba resep-resep saka Lamtoro, muga-muga mari saka Kersane sing Maha Kuwasa.

Features_Rizqi amalia