Teroris, Narkoba lan Korupsi

Penyakit abot sing nggrogoti bangsa Indonesia iki ana telu, yaiku teroris, narkoba lan korupsi. Telu-telune ora ana sambung  rapete, nanging akibat saka kuwi yaiku gawe rusak, gawe resah lan gawe ora tentreme masarakat Indonesia. Wektu lan beya milyaran, triliunan sing mesthine bisa kanggo mbudidaya kemajuan lan mbangun bangsa mung muspra entek kanggo mbrasta penyakit telu kasebut. Nanging penyakit kuwi mau ora saya suda, malah saya njamur.

Kanggo mbrasta teroris, pemerintah ndhapuk Densus 88 Anti Teror Kepolisian sing tansah bisa kanthi cekat-ceket mburu lan nangkep sapa wae lan ing papan ngendi wae para pelaku teror, sarta ngungkap jaringane, uga modus sing nyurung marang tumiundak teror kuwi.Sejatine, para anggota Densus 88 Anti Teror kuwi uga ngadhepi resiko sing ora entheng, yaiku n
Nyawa. Kasile uga ora tanggung-tanggung, Densus 88 Anti Teror iki wis sering nangkep teroris kang ana ing Indonesia iki kayata, wektu ngudhal jaringan teroris sing gerake ing Solo lan Karesidenan Surakarta kang ana sesambungane karo teroris ing dhaerah-dhaerah sa Indonesia kalebu ing Poso Sulawesi Tengah. Nanging kasunyatane, gerakan teroris isih wae ana terus.

Kanggo mbrasta panyebaran narkoba, pamerintah ndhapuk Badan Narkotika Nasional (BNN) minangka bebadan sing nanggulangi sumebare panyalahgunaan narkoba. Ana ing kalangan Kepolisian uga ndhapuk polisi mligi kang tugase menehi panyuluhan kanggo njaga aja nganti para generasi mudha njegur ana ing donya narkoba kang mbebayani. Uga nduweni wewenang nangkep sapa wae sing konangan nggunaake utawa nyebarake narkoba. Wis akeh pangguna, pangedhar, pangusaha lan panyelundhup narkoba kang wis mlebu kunjara amarga ngonsumsi, ngiderake, lan mrodhuksi obat haram kuwi. Nanging nyatane masarakat isih wae akeh kang remen karo narkoba kuwi, mangka akibat saka narkoba bisa nglumpuhake gegayuhaning bangsa.

Pamerintah mbrasta korupsi karo bebadan kang diwastani Komisi Pemberantasan Korupsi (KPK), tugase mligi ngurusi perkara korupsi sing gedhe-gedhe. Sapa wae sing korup nyelewengke dhuwit rakyat nganggo kepentingan pribadhi, bakal nduweni urusan karo KPK. Korupsi akeh-akeh katindakake dening Pejabat Negara utawa Pegawai Negeri Sipil, mula ing kalangan eksekutip wae. Nanging saiki wis sumrambah ing kalangan legislatip lan yudikatip. Kalangan legislatip sing kudune ngawasi eksekutip, jebul malah prelu diawasi. Samono uga yudikatip sing kudune ngadili jebul malah prelu diadili. Malah KPK dhewe kaya arep digawe ringkih karo DPR kanthi wewenange ing babagan netepake lan revisi UU KPK, lan liwat Kepolisian kanthi prastawa cecak lawan baya. Mangka menawa pambrantasan korupsi gagal, ora bisa digambarake kepriye mengko kadadeane yen rakyat bakal padha nesu lan ngatokake kakuatane.

Telung penyakit kaya mau kudu ditanggulangi, dibrasta, lan diilangi. Kudu ana semangat kanggo mbrasta penyakit telu kuwi, prelu digugah terus aja nganti dialang-alangi supaya luwih kasil tinimbang sing wis katindaake saiki. Kanggo generasi panerus bangsa, aja nganti nuladhani tindakan-tindakan ala masarakat kang wis kajangkit penyakit telu mau. Sing becik, yaiku kudu mbrasta teroris, narkoba, lan korupsi kuwi.

Opini_Rizqi amalia