Lelabetan ingkang Mujudaken "Tresna Jalaran saka Kulina"

Pahlawan tanpa tanda jasa, istilah menika ugi kasandhang dening tiyang estri ingkang nama Estiningtyas Utami, minangka guru ing Taman Kanak-Kanak Condrorini, Klegenwonosari. Ibu Esti, menika miyos ing Kebumen, 16 Juli taun 1962. Sanajan samenika sampun yuswa 50 taun, nanging panjenenganipun taksih kagungan greget kangge mucal lan mbimbing putra putri bangsa supados saged dados tiyang ingkang migunani tumrap agami, bangsa, lan nagari.

Panjenenganipun leladi kangge negari wiwit taun 1984 dados guru wiyata bakti lajeng kaangkat dados PNS nalika taun 1989, mucalipun ing Taman Kanak-Kanak Panti Siwi Utami Klegenrejo dumugi taun 1996, lajeng ngalih wonten ing Taman Kanak-Kanak Condrorini Klegenwonosari taun 1996 dumugi samenika.

Ibu Esti menika dipuntresnani sanget dening murid-muridipun, kanyata nalika dipunpanggihi ing sekolahan ing wekdal istirahat, katingal murid-muridipun caket kaliyan panjenenganipun, menawi panjenenganipun saweg cariyos, murid-muridipun sami nggatosaken, ugi wonten ingkang wantun taken kanthi lugu. Ingkang nyenengaken malih  nalika bibar sekolah, murid-muridipun ngantos sami rebutan namung kangge salaman kaliyan gurunipun menika.

Guru menika kangge digugu lan ditiru dening muridipun. Pranyata, guru lulusan saking IKIP-PGRI Semarang menika ugi mujudaken guru ingkang saged dados tuladha, mboten namung kangge muridipun nanging ugi kangge guru-guru sanesipun. Nalika taun 2004, panjenenganipun pikantuk juara setunggal guru berprestasi ing tingkat Kabupaten Kebumen, lajeng makili Kabupaten Kebumen wonten ing lomba guru berprestasi tingkat Propinsi Jawa Tengah. Panjenenganipun ugi pikantuk juara tiga nalika lomba cipta dan menyanyi lagu anak ing tingkat Kabupaten Kebumen.

Tiyang estri menika ugi saged dipunsebat ibu super sibuk amargi piyambakipun minangka ibu rumah tangga ingkang nyambutdamel dados guru, ugi nyambutdamel ing organisasi. Wiwit taun 1989 dumugi wulan Januari ing taun 2012 menika dados sekretaris IGTKI Kecamatan Klirong , salajengipun kapatah dados ketua IGTKI Kecamatan Klirong ngantos dumugi benjang taun 2017. Panjenenganipun ugi ndherek iguh wonten ing organisasi masarakat, kadosta ing PKK minangka pengurus keuangan UP2K, dene ing program PNPM minangka wakil tokoh perempuan.

Sanajan kathah padamelanipun, ibu ingkang peputra tiga menika boten kesupen kaliyan kulawarganipun lan tanggeljawabipun minangka ibu rumahtangga. Panjenenganipun ugi tetep nggatosaken putra-putranipun wonten ing bab pendidikan lan ugi bakatipun ingkang putra, mila para putranipun dipundherekaken les, kadosta les nglukis lan nari. Panjenenganipun tetep nyelani wekdal kangge ngancani putra-putranipun anggenipun sinau. Anggenipun nggulawenthah putranipun kanthi telaten lan sabar, tanpa kekerasan lan paring kebebasan dhateng putra-putranipun kangge nglampahi pepenginan lan menapa ingkang dados cita-citanipun, sauger ingkang dipuntindakaken menika leres lan migunani. Nalika cariyos menika panjenenganipun lajeng enget kaliyan tiyangsepuhipun, bapakipun ingkang sampun tilar donya.

“Rumiyin dados guru menika sajatosipun pepenginanipun bapak, amargi bapak lan ibu kula menika ugi nyambutdamel dados guru”, mekaten cariyosipun ibu Esti. “Bapak menika kagungan sipat keras dhateng para putranipun. Menapa kemawon ingkang dipunkarepaken dening bapak menika, lare-lare nggih kedah manut. Nalika kula lulus SMP lan badhe nerasaken wonten ing SMA, bapak boten marengaken lan nedahaken kula mlebet SPG (Sekolah Pendidikan Guru). Sampun kula turuti ndaftar, nanging boten ketampi, lajeng bapak kula duka. Lha, pungkasanipun kula mlebet wonten KPG (Kursus Pendidikan Guru)”, ibu Esti nglajengaken anggenipun cariyos.

Wonten ing KPG wekdal menika namung wonten jurusan Taman Kanak-Kanak, dados panjenenganipun pikantuk sangunipun kangge dados guru TK. Lajeng nerasaken S1 nalika taun 2000 wonten ing IKIP-PGRI Semarang mendhet jurusan PPB (Psikologi Pendidikan dan Bimbingan) lan lulus ing taun 2004. Dalan anggenipun dados guru kados menika wiwitanipun, inggih awit dipunpeksa kaliyan tiyang sepuh, nanging nalika sampun nglampahi pedamelan menika inggih sampun kraos sekeca amargi sampun kulina, mucal lare-lare alit wiwit taun 1984 dumugi samenika sampun 28 taun dangunipun.

Ngendikanipun ibu guru berprestasi menika, “Dados guru TK menika nyenengaken sanget. Dados guru TK menika saged kangge panglipur, awit wonten ing sekolah menika guru kedah ngetingalaken sikep ingkang positif. Dados, senajan wonten perkawis ing nggriya, boten nate guru TK menika mbeto perkawisipun wonten ing sekolah. Menawi sampun kepanggih lare-lare ing sekolahan menika raosipun seneng.” Nggih menika ingkang dipunwastani tresna menika jalaran saka kulina.

                                                                                      

dening: Estri Wiji Asih